ទីភ្នាក់ងារឧតុនិយមជប៉ុនព្រមានថា គ្រោះរញ្ជួយដីធំៗអាចវាយប្រហារតំបន់នេះក្នុងសប្តាហ៍ក្រោយ
យោងតាមរដ្ឋាភិបាលក្នុងតំបន់បានឱ្យដឹងថា គ្រោះរញ្ជួយដីបានបន្តវាយប្រហារប្រទេសជប៉ុនកាលពីថ្ងៃពុធ ខណៈដែលចំនួនអ្នកស្លាប់ដោយសារការរញ្ជួយដីដ៏ខ្លាំងជាបន្តបន្ទាប់បានកើនឡើងដល់ 62 នាក់។
មុននេះ នាយករដ្ឋមន្ត្រីជប៉ុន លោក Fumio Kishida បាននិយាយថា ក្រុមអ្នកជួយសង្គ្រោះកំពុងស្ថិតក្នុង “សមរភូមិប្រឆាំងពេលវេលា” ខណៈដែលចំនួនអ្នកស្លាប់បន្តកើនឡើង។
កម្លាំង រញ្ជួយកម្រិត ៧.៦ រ៉ិចទ័ រ បានវាយលុក ប្រទេសជប៉ុន កាលពីរសៀលថ្ងៃច័ន្ទ ធ្វើឱ្យខូចខាតអគារ និងផ្លូវថ្នល់ ដែលជាហេតុជំរុញឱ្យប្រទេសនេះចេញ ការព្រមានអំពី រលកយក្សស៊ូណាមិ នៅតាមឆ្នេរសមុទ្រផងដែរ។ ការព្រមានអំពីរលកយក្សស៊ូណាមិ ក្រោយមកត្រូវបានដកចេញនៅព្រឹកថ្ងៃអង្គារ។
មនុស្សជាង ៣០០នាក់ត្រូវបានគេរាយការណ៍ថាបានរងរបួស ហើយ២០នាក់ក្នុងចំណោមពួកគេស្ថិតក្នុងស្ថានភាពធ្ងន់ធ្ងរ។
ក្រុមជួយសង្គ្រោះបានតស៊ូក្នុងសីតុណ្ហភាពត្រជាក់កាលពីថ្ងៃអង្គារ ដើម្បីទៅដល់តំបន់ដាច់ស្រយាល ដែលមនុស្សជាច្រើនភ័យខ្លាចថាជាប់នៅក្រោមអគារដែលដួលរលំ។
នាយករដ្ឋមន្ត្រីបាននិយាយក្នុងអំឡុងពេលកិច្ចប្រជុំគ្រោះមហន្តរាយបន្ទាន់មួយថា “ការស្វែងរក និងជួយសង្គ្រោះអ្នកដែលរងផលប៉ះពាល់ដោយការរញ្ជួយដីគឺជាការប្រយុទ្ធនឹងពេលវេលា” ។
មនុស្សជិត 31,800 នាក់កំពុងស្ថិតនៅក្នុងជម្រកនៅពេលនេះ ខណៈដែលផ្ទះរាប់ម៉ឺនខ្នងត្រូវបានបំផ្លាញ៕
ប្រភពអត្ថបទព័ត៌មាន៖ INDEPENDENT
ប្រភពវិដេអូព័ត៌មាន៖ Arirang News
ស្រាវជ្រាវ និងកែសម្រួលអត្ថបទ៖ ម៉ុន គង់មាន